Siglir tar il cuntegn
cuntegn

Svizra Uschia vul il Cussegl naziunal spargnar ils proxims trais onns

Il Cussegl naziunal vul spargnar en tut pli pauc ch’il Cussegl federal, dentant dapli ch’il Cussegl dals Chantuns. Quai è cler suenter ch’il Cussegl naziunal ha approvà il program da stabilisaziun. En la votaziun finala hai dà 132 vuschs per e 53 vuschs cunter il program da stabilisaziun.

Ina tastga cun si la crusch svizra.
Legenda: Cunzunt tar l'agid als pajais en svilup vul il Cussegl naziunal spargnar. Keystone

Sco davos ha il Cussegl naziunal anc debattà davart ina reducziun da la cumpart federala vi da las reducziuns individualas da las premias da las cassas da malsauns. Ed el è suandà al Cussegl federal da sbassar quellas da 7,5% sin 7,3% dals custs bruts da l'assicuranza da basa obligatorica. Il Cussegl dals chantuns è sa decidì cunter questa mesira.

Spargnar tar il persunal

Avant era sa mussà ch'il Cussegl naziunal vul surtut spargnar tar il persunal da la Confederaziun. Uschia ha el acceptà la proposta da la cumissiun che vul spargnar ils onns 2018 e 2019 radund 100 milliuns francs dapli che quai ch’il Cussegl federal propona da spargnar. En tut duai vegnir spargnà tar il persunal il 2018 243,4 milliuns francs, ed il 2019 alura 249,8 milliuns francs. Posts da duana na duajan dentant betg vegnir serrads, ha il pledader da la cumissiun accentuà. Er po la Confederaziun sa participar en singuls cas vid la finanziaziun da rentas transitoricas tar pensiunaments anticipads.

Spargnar tar l’agid al svilup

Ils daners per l’agid als pajais en svilup duai en cumparegliaziun cun il plan da finanzas dal 2017 vegnir stritgads per 143 milliuns francs. Il 2018 muntan las scursanidas per l’agid als pajais en svilup a 200,5 milliuns francs, ed il 2019 a 243,4 milliuns francs. Uschia porta l’agid als pajais en svilup quasi in quart da las entiras mesiras da spargn da la Confederaziun. Ina proposta da la cumissiun da renunziar sin 100 milliuns francs il 2018 e 2019 ha il Cussegl naziunal refusà.

La maioritad era per spargnar

Avant che cumenzar la debatta ha il Cussegl naziunal refusà cleramain las propostas da la partida socialdemocrata da betg entrar en la materia davart il program da stabilisaziun 2017-2019. Adumbatten han la PS ed ils Verds argumentà ch’il pachet da spargn na saja necessari ed era nuschaivel.

RR novitads 12:00+