Siglir tar il cuntegn
Inhalt

Svizra USA: Refurma da taglia custa milliardas a la Credit Suisse

La Credit Suisse tira consequenzas: La banca gronda svizra scriva giu 2,3 milliardas francs pervia da la refurma da taglia en ils Stadis Unids.

Logo Credit Suisse.
Legenda: Credit Suisse lauda en general però la midada da lescha en ils Stadis Unids: ella haja effects positivs. Keystone

Il pli impurtant en curt:

  • Per il 4. quartal sto la Credit Suisse tenor atgnas indicaziuns scriver giu 2,3 milliardas francs.
  • Motiv per quest agir èn bunificaziuns da taglia che han pervia da la refurma da Trump damain valita.
  • La banca gronda sto perquai danovamain quintar cun ina sperdita annuala e quai per la terza giada en roda.

Tenor ina communicaziun da la Credit Suisse sto la banca scriver giu en il 4. quartal dal 2017 ina summa da var 2,3 milliardas francs. Curt avant questa communicaziun ha il president american Donald Trump cun sia suttascripziun mess en vigur la pli gronda refurma da taglia dapi 30 onns. Gia avant che la refurma giaja en vigur era vegnì speculà en la publicitad davart ils effects negativs da quella per las firmas.

Per la Credit Suisse vegn quai a muntar la terza perdita annuala en seria. Ils emprims nov mais 2017 ha la banca pudì preschentar in gudogn dad 1,1 milliardas francs.

Credit Suisse lauda midada da lescha

En sia communicaziun lauda la Credit Suisse en general però la midada da lescha en ils Stadis Unids. Quella haja effects positivs sin l'economia americana ed er sin l'atgna fatschenta en ils Stadis Unids. Ulteriurs detagls davart las consequenzas da la refurma da taglia vegn la banca gronda dentant a publitgar en il quint annual ils 14 da favrer 2018.

RR novitads 06:00