Siglir tar il cuntegn
Inhalt

Svizra USA: Pli luccas reglas per las bancas - er svizras profiteschan

Cun in decret ha il nov president dals Stadis Unids schluccà las reglas per bancas e fatschentas a la bursa. Reglas, che ses antecessur Barack Obama aveva introducì per evitar ina nova crisa da finanzas. Per l'expert da finanzas Damian Gliott n'è quel sectur betg il lieu per schluccar las reglas.

Donald Trump suttascriva in da numerus decrets, tranter auter er quel per schluccar las reglas per las bancas.
Legenda: Donald Trump suttascriva numerus decrets – tranter auter er quel per schluccar las reglas per las bancas. Keystone

Betg bun è tenor Damian Gliott che las bancas na ston betg pli avair tant chapital agen sco fin qua. Plinavant pon ellas puspè far dapli fatschentas sin atgna ristga ed ils survegliaders n'han en l'avegnir betg pli tantas pussaivladads d'intervegnir sch'ina banca è en miseria finanziala.

En cumbinaziun cun ils managers che na fetschian betg fatschentas a lunga vista mabain be per segirar il proxim bonus è Damian Gliott da l'avis, che la ristgia ch'il stadi sto puspè siglir en cun daners da taglia en cas d'ina crisa, creschia.

Anc lunsch davent d'ina nova crisa

Tenor l'expert da finanzas saja ina nova crisa anc lunsch davent perquai che tant l'Uniun uropeica sco er la Svizra vegnian betg a schluccar las reglas. L'Europa vegnia vinavant ad insister sin quai che las bancas hajan avunda chapital agen e sajan segiras. Uschia vegnian ins n'er betg a sentir bler dal nov decret sin il martgà da finanzas europeic e svizzer.

Avantatgs per las bancas

Cun las reglas pli luccas vegn la fiera americana puspè pli attractiva, er per las bancas svizras che fan fatschentas en ils Stadis Unids. Quai malgrà che la ristga per las bancas saja bler pli gronda sin la fiera americana che sin autras fieras.

Plinavant pudess il nov decret tenor Damian Gliott er franar in zic l'unda da regulaziuns da l'ultim temp er per il martgà da finanzas svizzer.

RR actualitad 12:00