Siglir tar il cuntegn

Svizra Uri: Eclat pervi da center d'asil

Durant ina saira d’infurmaziun per in center da requirents d’asil a Seelisberg, chantun Uri, han ils preschents attatgà verbalmain la cussegliera guvernativa Barbara Bär che ha stuì rumper giu sia preschentaziun. Ussa duai ina maisa radunda gidar.

massa glieud en ina hala da gimnastica
Legenda: Radund 400 persunas han vulì sa laschar infurmar a Seelisberg. Keystone

Radund 400 persunas han vulì sa laschar infurmar en la sala da gimnastica dal vitg che dumbra 700 abitants. La cussegliera guvernativa Barbara Bär (PLD), represchentants dal chantun e da la Crusch cotschna han vulì orientar la populaziun davart il center per requirents planisà. Gia l'entschatta è Bär vegnida interrutta d'ina adversaria.

«Uschia betg»

La pledadra d'ina cuminanza d'interess cunter il center d'asil ha rinfatschà a la cussegliera guvernativa mancanza da respect e maniera. La vischnanca saja vegnida mess avant fatgs accumplids. Cun sia giagliardia politica haja ella semnà discordia en l'entira vischnanca.

La vischnanca da Seelisberg cun 700 abitants na possia betg supportar 60 requirents d’asil, uschia han ditg pliras persunas.

Rut giu suenter in'ura

La cussegliera guvernativa Barbara Bär ha empruvà pliras giadas da cuntinuar cun ses referat dentant senza success. Ella è sa mussada trumpada da l'opposiziun vehementa da la vischnanca ed ha crititgà che represchentants da la vischnanca hajan anc sustegnì l'opposiziun enstagl da mitigiar la situaziun. Suenter radund in'ura è l'occurrenza vegnida rutta giu, sin proposta dal president communal.

Barbara Bär ha declerà suenter l’occurrenza ch’ella veglia tuttina realisar quest center d’asil e ch’ella vegnia a clamar ad ina maisa radunda.

RR novitads 06:00