Siglir tar il cuntegn
Inhalt

Svizra Uniun da tgira inoltrescha iniziativa «Per ina ferma tgira»

Cun in'iniziativa populara vul l'Uniun da persunal da tgira rinforzar la professiun ed impedir ina mancanza da persunal. Mardi han ils iniziants inoltrà las suttascripziuns.

persuna che survegn infusiun
Legenda: Cun pajas commensuradas, scolaziun e furmaziun da qualitad e dapli responsabladad per il persunal vul l'iniziativa meglierar l'attractivitad da la professiun. Keystone

Aifer 8 mais ha l'Uniun dals spezialists da tgira rimnà radund 120'000 suttascripziuns. L'iniziativa «Per ina ferma tgira» – era enconuschenta sco «Iniziativa da tgira» – ha l'uniun inoltrà mardi cun 112'000 suttascripziuns validadas.

La glieud saja cunscienta dals problems

Quai saja stà pussaivel aifer uschè curt temp tranter auter, perquai che la glieud sentia ch'il persunal da tgira lavuria sut squitsch e saja savens stressà, communitgescha l'uniun.

Maun public duai promover qualitad

L'iniziativa pretenda che Confederaziun e chantuns promovian la tgira sco impurtanta part dal provediment da sanadad. Els duain procurar per ina tgira suffizienta d'auta qualitad che saja disponibla per tuts, e segirar ch'avunda persunas dal fatg stettian a disposiziun.

Render pli attractiva la professiun

Ultra da quai duai l'attractivitad da la professiun sco tala vegnir meglierada. Per quai duai la Confederaziun dar dapli cumpetenzas al persunal da tgira. Quai sper la pretensiun da pajas che correspundian a las pretensiuns e cundiziuns da lavur professiunalas.

RR novitads 15:00