En ina campagna ch'ella ha lantschà oz a Berna pretenda ella che la politica autoriseschi dapli persunal e ch'ella procuri par meglras cundiziuns da lavur.
Dumber da burn-outs crescha
Adina dapli tgirunzas e tgirunz midian lavur ed il dumber da persunas cun burn-out creschi ad in crescher. Per Udo Michel da l'Unia è quai in clar mussament ch'il squitsch da lavur en la tgira ha cuntanschi in nivel betg pli supportabel.
Il temp da lavur è fitg irregulars. Perquai ch’i dat memia pauc persunal ston ils collegas adina puspè siglir en, lavur sin dumonda e è la regla e las pajas n’èn era betg autas.
Tuts meritan ina buna tgira
Uschia na possia quai betg cuntinuar. Tuts sajan la fin finala interessads ch'i vegni prestà buna lavur. Tuts meritian ina buna tgira. Ed ina buna tgira s'orienteschi al bainstar dil carstgaun, a ses basegns e buc als custs. Ils cussedents n’èn nagins jogurts mabain carstgauns. I è perquai impurtant da porscher ina tgira cumpletta e cumplementara. Agir sco in roboter na funcziuna betg. I dovra temp ed i è impurtant da sa fatschentar cun ils cussedents.
Il sindicat Unia ha perquai lantschà ina campagna naziunala ed ina petiziun cun il titel »Buna tgira dovra bunas cundiziuns da lavur«. Els pretendan cunzunt ch'i vegnian stgaffidas dapli plazzas per tgirunzas e tgirunz.
Las mesiras da promoziun ch'il Cussegl federal ha lantschà avant intgins onns beneventian els, di Udo Michel. Mo quai na tanschi betg. La mancanza da persunal saja cronica. Il grond dumber da persunas che bandunian la professiun saja la consequenza da las cundiziuns da lavur precaras e la mancanza d'appreziaziun e stima.
Lantschar discussiun per il futur da la tgira
Mo cun la campagna e la petiziun veglian els anc cuntanscher insatge auter, di Michel. Els veglian lantschar ina discussiun davart il futur da la tgira.
Co vesan quai las chasas da tgira? Monika Weder da Curaviva, l'associaziun dals instituts socials e da tgira svizzers, sustegn da principi las pretensiuns da l'Unia. Impurtant sajan per els dentant era ina bun'organisaziun dals manaschis ed ina meglra cumpatibilitad da lavur e famiglia.