Siglir tar il cuntegn
Inhalt

Svizra UNHCR crititgescha pratica restrictiva da la Svizra

L’autoritad da fugitivs da l'ONU UNHCR crititgescha la Svizra pervi da sia pratica da prender si la maioritad dals requirents d'asil da la Siria ad interim e da mo renconuscher ina minoritad sco fugitivs.

Fugitivs arrivan en Svizra.
Legenda: Savens na pon ulteriurs commembers da famiglias betg suandar ils fugitivs en Svizra. Keystone

«La Svizra pratitgescha ina politica memia restrictiva visavi requirents d'asil da la Siria», hai gì num en la NZZ am Sonntag. Fertant che stadis europeics renconuschian en media 70% dals Sirians sco fugitivs, muntia la quota en Svizra a 35%.

Tals fugitivs ch'èn vegnids recepids ad interim stoppian quintar mintga mument, ch'els vegnian puspè tramess davent ed hajan in access restrenschì a la fiera da lavur.

Müller (PLD) pretenda dapli controllas da cunfin

Il president da la PLD svizra, Philipp Müller, pretenda dapliras e pli intensivas controllas da cunfin. Damai ch'ils pajais vischins fetschian quellas, duai era la Svizra far talas, ha Müller ditg en in’intervista cun la NZZ am Sonntag.

El temia che la Svizra daventia uschiglio in magnet per fugitivs. Bain preferiss Müller ina soluziun europeica per la crisa da fugitivs, ma el dubitia che quella vegnia spert.

RR novitads 09:00