Siglir tar il cuntegn

Header

cuntegn

Svizra Ulteriura emprova per in nov stadion a Turitg

Suenter che differents projects han fatg naufragi ha la citad da Turitg preschentà oz avant mezdi in nov project. Sin l’areal dal vegl stadion Hardturm duai vegnir realisà in stadion nov.

audio
Project nov stadion a Turitg
ord RTR Audio dals 12.07.2016.
laschar ir. Durada: 1 minuta 23 Secundas.

Il nov project che la citad ha preschentà cumpiglia in stadion plitost modest cun 18'500 plazs, dasperas 173 abitaziuns cooperativas - e - main modest, anzi marcant, dus sgrattatschiels da mintgamai 137 meters cun biros ed abitaziuns. Finanzià vegniss l’entir project da la Credit Suisse sco investura principala. La citad metta a disposiziun il terren en dretg da bajegiar. Ina votaziun dal pievel n’è il mument betg prevesida, è dentant tenor il cusseglier da la citad Daniel Leupi n’era betg sclausa.

Odissea bain baud a fin?

Il nov stadion da ballape da Turitg, quai è sco ina odissea, in viadi che para da buc ir a fin. Avant 13 onns, il settember 2003, han votantas e votants da Turitg detg «gea» ad in nov stadion cun 30’000 plazs sin l’areal dal Hardturm. Quai stadion avess gì dad esser pront per l'EURO 2008. Differents recurs han dentant retardà il project e la finala è quel vegnì sistì. Per tuttina esser pront per l'EURO ha la citad bajegia tut a la bahuta il nov stadion Letzigrund, in stadion cumbinà per atletica leva e ballape. Quel n’è insumma betg ideal per ballape perquai ch'ils aspectaturs èn bler memia lunsch davent dal plaz. Adina puspè hai perquai dà propostas per in nov stadion per ils dus clubs GC ed FCZ, nagina è dentant vegnida realisada.

RR actualitad 12:00

Artitgels legids il pli savens