Cun il virus stoppian ins viver en l'avegnir, di Daniel Koch, il responsabel da la partiziun per malsognas transmissiblas tar la Confederaziun. Dentant viver cun il virus u agir en ina situaziun nua che bleras persunas han il virus sajan duas differentas chaussas. Che la cifra dals infectads creschia ils proxims dis en Svizra saja inevitabel, di Koch. Entant ch’ils cas èn survesaivels pon ins cuntinuar cun il sistem sco enfin uss; numnadamain da persequitar mintga cas. Però sche la cifra da persunas infectadas s'augmentia svelt, hajan ins mo pli las capacitads per ir suenter als cas grevs.
Blers cas senza grondas cumplicaziuns
L'expert tar la Confederaziun per malsognas transmissiblas di ch'ins stoppia adina puspè pensar vidlonder ch’ils blers cas d'infecziun sa sviluppian senza grondas cumplicaziuns e senza ch'ina ospitalisaziun fetschia da basegn. Quel punct saja impurtant da suttastritgar, di Koch, perquai che sch’il virus sa derasia pli ferm en Svizra hajan ins mo pli las capacitads da curar ils grevs cas.
Campagna d'infurmaziun
La Confederaziun appellescha a l'atgna responsabladad e per solidaritad. Ins duai empruvar da prevegnir cun lavar bain ils mauns, tusser en il cundun e star a chasa sch'ins ha fevra u la tuss. Era ha la Confederaziun in numer da telefon ch'ins po telefonar 24 uras a di e quai 7 dis l'emna. Il numer vegnia duvrà fitg bler, din ils responsabels da l'Uffizi federal da sanadad. Ed els fan attent ch'ulteriuras infurmaziuns sa chattan era sin la pagina d'internet da la Confederaziun.
RTR novitads 17:00
