Uffants svizzers èn pitschens magliacudeschs

Radund 70% da tut ils uffants svizzers legian almain ina giada l'emna durant il temp liber en in cudesch. 37% nizzegian il cudesch schizunt mintga di u bunamain mintga di. A questa conclusiun vegn in studi davart utilisar las medias dals uffants tranter 6 e 13 onns.

uffant che sesa gilun plaun e legia

Legenda da maletgs: 37% dals uffants svizzers legia mintga di en in cudesch u er in e-reader. Keystone

La generaziun «touchscreen» è dapli mitos che realitad. Quai demussa in'enquista che la Scol'auta turitgais per scienzas applitgadas ha fatg. «Ils uffants en la Svizra èn pitschens magliacudeschs», di Gregor Waller, in dals auturs dal studi.

El ed il team da perscrutaziun mediapsicologic da la Scol'auta da Turitg per scienzas applitgadas ZHAW han dumandà 1'000 uffants e 600 geniturs. Il grond dumber haja surprendì el, ha ditg Waller, Spezialmain perquai ch'ins auda savens ch'ils uffants giogan sulet sin lur telefonins e vid computers.

«  Uffants sa legran d'emprender da leger »

Christine Tresch
experta da litteratura

En Germania legia mo mintga segund uffant

En cumparegliaziun cun la Germania è la quota svizra era auta. Là legian sulet 50% dals uffants ina giada l'emna en in cudesch. En la Svizra n'è il cudesch tar ils uffants betg mo pli popular, el damogna era las medias novas. Cun 70% è il cudesch sin plazza 3 suenter tadlar musica (80%) e guardar televisiun (80%). Il leger vegn dentant avant «gamen» (61%), telefonin (43%) ed internet (42%).

L'experta da litteratura a l'institut svizzer per medias per uffants e giuvenils, Christine Tresch, ha ditg a la gasetta ch'ils uffants sa legran sin il leger ed els sajan superbis d'avair dumagnà in cudesch.

RR novitads 11:00