La generaziun «touchscreen» è dapli mitos che realitad. Quai demussa in'enquista che la Scol'auta turitgais per scienzas applitgadas ha fatg. «Ils uffants en la Svizra èn pitschens magliacudeschs», di Gregor Waller, in dals auturs dal studi.
El ed il team da perscrutaziun mediapsicologic da la Scol'auta da Turitg per scienzas applitgadas ZHAW han dumandà 1'000 uffants e 600 geniturs. Il grond dumber haja surprendì el, ha ditg Waller, Spezialmain perquai ch'ins auda savens ch'ils uffants giogan sulet sin lur telefonins e vid computers.
Uffants sa legran d'emprender da leger
En Germania legia mo mintga segund uffant
En cumparegliaziun cun la Germania è la quota svizra era auta. Là legian sulet 50% dals uffants ina giada l'emna en in cudesch. En la Svizra n'è il cudesch tar ils uffants betg mo pli popular, el damogna era las medias novas. Cun 70% è il cudesch sin plazza 3 suenter tadlar musica (80%) e guardar televisiun (80%). Il leger vegn dentant avant «gamen» (61%), telefonin (43%) ed internet (42%).
L'experta da litteratura a l'institut svizzer per medias per uffants e giuvenils, Christine Tresch, ha ditg a la gasetta ch'ils uffants sa legran sin il leger ed els sajan superbis d'avair dumagnà in cudesch.
RR novitads 11:00