Il cusseglier dals chantuns Martin Schmid da la PLD aveva speculà sur da la demissiun dad Ueli Maurer la saira avant, ma el n'aveva betg pli fatg quint ch'el sa retira suenter ch'el n'aveva ditg nagut en il Cussegl naziunal.
Er la cussegliera naziunala Anna Giacometti (PLD) era fitg surpraisa d'udir ch'il minister da las finanzas sa retiria, ella n'aveva udì nagut dad ina demissiun durant tut la sessiun.
Ueli Maurer era adina fitg preschent, aveva sut controlla la cifras ed era simpatic.
La Bregagliotta enconuscha Ueli Maurer or da la lavur en la cumissiun da finanzas. Là haja Maurer fatg ina fitg buna impressiun. El saja adina stà fitg preschent e haja adina gì sut controlla las cifras ed era er fitg simpatic.
Er Martin Schmid ha lavura cun el en ina cumissiun. L'onn passà è Ueli Maurer perfin viagià cun Schmid a Samignun cura che la vischnanca aveva difficultads. Schmid era fitg impressiunà sco ch'il cusseglier federal ha tratg decisiuns e schlià problems al lieu.
Buna lavur durant la pandemia, ma er ina politica per las bancas
Jon Pult da la PS lauda la lavur dal departament da las finanzas durant la crisa dal coronavirus. Il departament haja lavurà en maniera fitg professiunala ed en l'interess da tut l'economia. Il politicher da la PS crititgescha però er las refurmas politicas dal politicher da la PPS, là haja il minister da las finanzas fatg ina politica fitg da dretga ed en l'interess da las bancas.
Martina Candinas vegn a manar l'elecziun per la successiun dad Ueli Maurer
Martin Candinas da l'Allianza dal Center ha fatg bunas experientschas cun il Turitgais, ina giada haja el envidà Ueli Maurer ad ina radunanza e quel haja spontanamain ditg gea senza consultar ses
cussegliaders.
Martin Candinas vegn a giugar ina rolla da parada cur ch'il successur u la successura vegn elegida. El vegn ad esser il nov president dal Cussegl naziunal.
La cussegliera naziunala per il Grischun Magdalena Martullo-Blocher na sta dentant betg a disposiziun per ina candidatura, ha ella ditg envers RTR.
Reacziuns da las partidas naziunalas
La partida dad Ueli Maurer ha engrazià ad el per l'engaschi nunstanclentaivel – surtut per l'armada ed era las finanzas. Sco ch'ella ha scrit en ina communicaziun deploreschia ella la demissiun da ses cusseglier federal.
Ueli Maurer sentiva il puls da la populaziun.
Il schef da la fracziun ha ludà che Ueli Maurer haja adina tschertgà il contact cun il pievel ed haja in bun sentiment per quel. La PPS ha intunà ch'ella haja vinavant il dretg sin il segund sez en la regenza naziunala sco pli gronda partida.
PLD e l'Allianza dal Center renconuschan il dretg da la PPS sin dus sezs en il Cussegl federal
L'Allianza dal Center ha engrazià ad Ueli Maurer per ses grond engaschi durant plirs onns. Il schef da fracziun Philipp Bregy ha ditg, ch'Ueli Maurer saja stà in cusseglier federal fitg manaivel al pievel e ch'el haja dà ina vista a la regenza.
L'Allianza dal Center renconuscha da princip il dretg da la PPS sin dus sezs en il Cussegl federal. Ella spetga dentant dal successur u la successura da resguardar las reglas da la colleghialitad.
Il president da la PLD differenziescha tranter il temp da Maurer sco minister da defensiun e sco minister da finanzas. Sco minister da defensiun n'haja el betg fatg ina bun'impressiun e pers la votaziun dal Gripen. Ses temp sco minister da finanzas saja però il cuntrari, lura haja el «acquistà gronda stima e respect dal parlament».
Sco l'Allianza dal Center renconuscha er la PLD da princip il dretg da la PPS sin dus sezs en il Cussegl federal. La PLD spetga ussa ina schelta da candidatas e candidats.
Sper laud er critica dals Verds
Per il president da la Partida verd-liberala, Jürg Grossen è Maurer ina persunalitad genuina ed in cusseglier federal remartgabel.
Ad Ueli Maurer èsi adina puspè reussì da bandunar la rolla da schuldà da la partida. Ma da l'autra vart ha el adina puspè gì muments ch'èn stads indegns per in cusseglier federal.
Betg cler saja ussa anc sch'ils Verds veglian contestar il sez liber en la regenza.
