Siglir tar il cuntegn
cuntegn

Svizra UBS: Partenza retegnida en l'onn da fatschenta

La banca gronda ha fatg in gudogn da 707 milliuns francs il prim quartal dal 2016. Avant in onn ha la banca fatg en il medem quartal in gudogn da 2 milliardas francs. Lura ha l'UBS dentant pudì profitar d'ina bunificaziun da taglia.

logo da UBS
Legenda: La clientella da l'UBS na betg vulì far commerzi cun vaglias. Keystone

La raschun principala per la sminuziun dal gudogn saja che l'activitad commerziala da la clientella saja stada uschè bassa sco anc mai, uschia ha communitgà la UBS. Las malsegirtads economicas e geopoliticas hajan attribuì a quest cuntegnair. Pattì il pli fitg da quai ha l'administraziun da facultad e la banca d'investiziuns.

Blers daners novs

La pli impurtanta sparta en il concern, il wealth management, ha surprais. Questa sparta ha registrà ils emprims trais mais daners novs en la valita da 15,5 milliardas francs. En spezial la regiun Asia/Pacific è sa svilupada fermamain. Cun 636 milliuns francs gudogn ha il wealth management ha la UBS gudagnà radund 130 milliuns dapli che l'ultim quartal 2015.

Speculaziuns davart reducziuns da plazzas

La banca gronda svizra ha pudì reducir ils custs. Cun 5,9 milliardas francs èn ils custs stads l'emprim quartal radund 200 milliuns sut ils custs da l'emprim quartal 2015. Il schef da l'UBS, Sergio Ermotti, è sa mussà cuntent cun il resultat: «Nus avain fatg in resultat robust en in conturn da martgà difficil. En vista a las activitads mudestas dals clients avain nus nizzegià nossas resuras a moda effectiva ed avain fatg progress tar ils custs.»

RR novitads 07:00