Siglir tar il cuntegn
cuntegn

Svizra UBS fa naufragi cun recurs cunter cauziun da milliardas

La giustia franzosa vegn probabel ad adossar a la banca UBS ina cauziun dad 1,1 milliardas euros. La banca gronda ha fatg naufragi avant il tribunal da la Communitad europeica per dretgs umans. La decisiun è crudada unanimamain.

logo da la banca UBS
Legenda: Ils derschaders pretendan da l'UBS da pajar la cauziun da 1,1 milliardas euros. Keystone

Il 2014 aveva la giustia franzosa obligà la UBS da pajar ina cauziun dad 1,1 milliardas euros perquai che la banca gronda duai avair gidà Franzos ritgs a defraudar taglia. La banca renviescha questas rinfatschas. L'UBS ha reclamà al tribunal da la Communitad europeica per dretgs umans. La banca vesa en la pretensiun ina violaziun da la libertad dal possess sco er da la presumziun d'innocenza (interpresas pon sa basar sin questas garanzias da la convenziun per il dretgs umans).

Ils derschaders a Strassbourg n'èn betg da quai maini. La cauziun saja sulet provisorica ed uschia betg ina sentenzia anticipada. Cun la cauziun possia vegnir segirà ch'ils accusads sajan preschents durant il process e che pussaivels donns u ina multa pussaivla vegnan pajads.

RR novitads 12:00