Siglir tar il cuntegn
Inhalt

Svizra Uber - taxists pretendan scumond immediat

Il servetsch da transport Uber duai vegnir scumandà en Svizra, uschè ditg ch'el na sa tegna betg vi da las leschas vertentas. Quai pretendan taxists da l'entria Svizra. Uber pericliteschia l'entira branscha da taxi. Ad ina conferenza da medias ha l'uniun da taxi naziunala lantschà ina nova campagna.

A Losanna han pliras taxists protestà cunter Uber cun transparents e figls sgulants.
Legenda: A Losanna han pliras taxists protestà cunter Uber cun transparents e figls sgulants. Keystone

Il concern da milliardas american gudogna vid mintga viadi, surpiglia però nagina responsabladad envers ils manischunzs dad Uber. El na paja ni prestaziuns socialas ni s'occupia da la segirezza dals clients, crititgeschan taxistas e taxists.

Uber duai surpigliar responsabladad

L’uniun da taxi naziunala pretenda dasper in scumond d’Uber e d’ina bloccada da l’app er ch’il concern vegnia fatg responsabel per «incitaziun sistematica a lavur naira ed transport da persunas professiunal a moda illegala». Part da l’uniun fan taxists da Turitg, Losanna, Genevra e Basilea.

Figls sgulants da la nova campagna cunter Uber.
Legenda: Figls sgulants da la nova campagna cunter Uber. Keystone

Uber stoppia vegnir tractà sco interpresa da taxis e saja da suttametter a las medemas leschas sco tut las autras centralas da taxis.

Charrar vinavant malgrà scumond

A Genevra lavura Uber vinavant, malgrà in scumond da lavur confermà dal Tribunal federal. La regenza vul dentant elavurar ina nova lescha da taxi che vegn a legalisar Uber. A Basilea è la legalisaziun gia per part realitad dapi l’atun passà. Ed er a Turitg èn ins para londervi da preparar ina lescha senza regulaziuns per Uber.

RR novitads 14:00