Siglir tar il cuntegn

Svizra Tut correct - Ueli Maurer defenda ils guardia-cunfins tessinais

Suenter la critica massiva da medias e politichers defenda il Cusseglier federal l'agir dals guardia-cunfins en il Tessin. Il corp fetschia diever da la lescha di Maurer en ina intervista cumparida en las gasettas Schaffhauser Nachrichten», «St. Galler Tagblatt» e «Neue Luzerner Zeitung».

In maun scriva placats dad avrir ils cunfins.
Legenda: Situaziun bloccada a Como - dapi mez fanadur vivan là radund 500 persunas suenter ch’ellas eran vegnidas refusadas al cunfin svizzer. Keystone

Tut giaja correctamain sche la guardia da cunfin tramettia enavos en l'Italia requirents d'asil che veglian viagiar vinavant en Germania, di Ueli Maurer. I na saja betg vaira, ch’ils guardia-cunfins refusassan als migrants da dumandar asil en Svizra. Mo il transit tras la Svizra per viagiar enavant en Germania als vegnia refusà – uschia co che la lescha pretendia quai, precisescha il Cusseglier federal.

L'emna passada avevan ovras d'agid e politichers crititgà questa pratica da la Svizra. La raschun per la critica è la situaziun actuala en la citad da cunfin taliana Como. Là èn bloccadas radund 500 persunas dapi mez fanadur suenter ch’ellas eran vegnidas refusadas al cunfin svizzer.

RR novitads 06:00