Siglir tar il cuntegn
Inhalt

Svizra Turitg: Nagin «Racial Profiling» da la polizia

La Dretgira superiura da Turitg ha decis ch’in Svizzer cun ragischs kenianas saja vegnì controllà da la polizia cun raschun. El haja empruvà da guntgir ils policists ed uschia evitar la controlla, argumentescha la dretgira sia sentenzia.

Purtret da persunas che stattan en pe davant in bajetg.
Legenda: Persunas che spetgan a Turitg davant la dretgira per pudair entrar. Keystone

L’um da 43 onns è da l’opiniun ch’el saja daventà in’unfrenda da l’uschenumnà «Racial Profiling». Pia ch’el saja mo vegnì controllà pervi da sia colur da pel. La controlla dispitaivla è stada il favrer 2015 en la staziun principala a Turitg. Perquai ch’el aveva refusà da mussar sia carta d’identitad als policists, sto el pajar ina multa da 100 francs. Cunter quai ha el purtà plant. Uss ha la Dretgira superiura dentant confermà la sentenzia da la preinstanza. La Svizra ha l'emprima giada stuì decider en in cas nua ch'i va per «Racial Profiling».

RR novitads 11:00