Siglir tar il cuntegn
cuntegn

Svizra Turgovia na vul betg franzos en la primara

Il chantun Turgovia stritga probabel l’instrucziun dal franzos en scola primara. En emprima lectura ha il Cussegl grond decis cun 64 cunter 53 vuschs ch'il franzos vegnia pir introducì sin stgalim superiur. En duas emnas discutescha il parlament anc ina giada en chaussa.

Purtret d'ina buoba che tigna in fegl franzos.
Legenda: La Turgovia vul cumenzar cun il franzos pir en la superiura. Keystone

Dapi 24 onns vegnia il franzos gia introducì en la 5avla classa en scola primara. Uss vulan ils politichers stritgar quai. Ins saja trumpà dal pitschen success. Blers scolars sajan surdumandads, uschia l'argumentaziun. Fin uss vegn l’englais instruì a partir da la terza primara, il franzos a partir da la tschintgavla.

Gia la stad 2014 aveva il parlament decis d’abolir il franzos tempriv. La Confederaziun aveva crititgà questa decisiun e smanatschà d’intervegnir sin stgalim federal en la dispita da linguas.

Ultim pled n'è anc betg discurrì

La Turgovia giaja uschia en ina via senza perspectivas e pericliteschia la diversitad da las linguas. L'argument ch'ils scolars sajan surdumandads na constetia betg. Trais quarts dals scolars n'haja nagins problems cun il franzos, quai haja in'enquista tar scolasts da la Turgovia mussà.

L'ultim pled n'è dentant anc betg discurrì. In referendum da las autoritads saja fitg probabel. Per che quel possia vegnir inoltrà dovria almain 30 da las 130 vuschs en il parlament. Il referendum po dentant vegnir lantschà pir suenter la votaziun finala. Quella duai dar durant la proxima sesida.

RR novitads 14:00