Siglir tar il cuntegn
Inhalt

Svizra Turgovia è cunter franzos en scola primara

Il Cussegl grond da la Turgovia ha decis il 2004 da stritgar l’instrucziun da franzos en la scola primara. Questa decisiun s’allontanescha dal plan d’instrucziun 21 - ed è uss en consultaziun. L’associaziun da scolasts ed ils directurs d’educaziun dals chantuns n’han betg grond plaschair.

Ina matta che scriva franzos en scola.
Legenda: Betg suletta - dasper la Turgovia hai dà en 12 auters chantuns inizativas dal pievel cunter il nov plan d'instrucziun 21. Keystone

La regenza dal chantun Turgovia vul ch'ils scolars da la scola primara n'emprendan betg pli franzos davent da l'onn da scola 2018. Tenor il nov plan d'instrucziun che la regenza ha tramess en consultaziun duai il franzos esser obligatori pir sin il stgalim superiur da la Turgovia.

Quai cuntrafa a l'uschenumnà cumpromiss da linguas ch'ils directurs d'educaziun dals chantuns avevan decidì avant 10 onns. Ed il minister da l'intern Alain Berset ha gia avertì pliras giadas ch'el na vegnia betg a tolerar ch'il franzos sin stgalim primar vegnia stritgà.

«Thurgauerlied» empè da franzos?

Perquai che l’instrucziun da franzos da la tschintg- e sisavla classa da fin qua vegn stritga, sto er ils uraris vegnir midads: las lecziuns da la scola primara vegnan stuschads sin il stgalim secundar. Sin quest stgalim han scolaras e scolars en l’avegnir lura dapli franzos.

La regenza vul en il futur a moda lianta che tuts scolars da la sisavla classa primara emprendan la chanzun tradiziunala da la Turgovia, l’uschenumnà «Thurgauerlied». L’argumentaziun persuenter è che «la promoziun musicala giaudia ina grond’impurtanza» en il chantun.

RR novitads 17:00