Siglir tar il cuntegn
Inhalt

Svizra Tschiffà l'attatgader da resgia a motor

La polizia ha arrestà l’um a Thalwil sper Turitg.

Legende: Video Il delinquent ch’ha blessà ier 5 persunas a Schaffusa è sta a Laax avant in per mais ed è dà en egl al patrun d’in albiert. abspielen. Laufzeit 01:26 Minuten.
Or da sil punct dals 25.07.2017.

La polizia aveva concentrà la tschertga da l'um da 51 onns en ils conturns da Schaffusa. Quai ha ella fatg cun l'agid da chauns e cun meds tecnics. Plinavant era era in cumond d'arrest internaziunal vegnì publitgà.

Fastizs en il Grischun

Era la polizia Grischuna ha gidà a tschertgar l’um. Quai saja dentant normal sch’i valia in scumond d’arrest per ina persuna, uschia la Polizia chantunala. Tscherts fastizs avevan manà era en il Grischun. Betg mo il numer da ses auto era grischun, l’um da 51 onns era er stà a Scuol ed a Laax. In tschert temp era el stà annunzià en la vischnanca da Scuol. Quai ha la vischnanca confermà envers RTR. Plinavant aveva el era pernottà ina notg a Laax en in albiert. Sco quai ch’il manader da l’albiert Capricorn Benj Schmid ha raquintà.

Attatga sin collavuraturs d'ina cassa da malsauns

Glindesdi avantmezdi aveva l'um attatgà tschintg persunas en ils biros da la cassa da malsauns CSS en la citad veglia da Schaffusa. Ina persuna era vegnida blessada grevamain, n'è dentant betg en privel da vita. Las ulteriuras quatter persunas ch'eran vegnidas blessadas han entant pudì bandunar l'ospital.

Il delinquent è privlus

Il delinquent saja in um senza suttetg ch'hajà vivì il davos temp en guauds, ha la polizia da Schaffusa communitgà a la conferenza da medias da glindesdi las 16:00. L'um è 1.90 meter grond, ha in chau blut ed è d'appariziun maltarschinada. La polizia aveva avertì la populaziun da la citad e dal conturn da Schaffusa che l'um saja privlus.

Purtret d'in um cun chavelsstgirs.
Legenda: Il delinquent che vegn tschertgà saja 1.90 meters grond ed haja vivì en ils guauds. Keystone

L'um da 51 onns haja problems psichics, ha la polizia infurmà. Duas giadas saja el stà sentenzià pervi da possess d'armas, en il chantun Berna ed en il chantun Lucerna. El vala sco privlus, e dasper la resgia a motor pudess el avair ulteriuras armas.

Avant in temp è l'um stà annunzià en il Grischun, ha dentant lura puspè bandunà uffizialmain il chantun. La polizia ha entant chattà il VW Caddy alv cun numer grischun, che l'um ha probablamain duvrà per fugir.

L'attatga da glindesdi avantmezdi

L'um armà cun ina resgia a motor era entrà il glindesdi avantmezdi en in bajetg cun biros en la citad veglia da Schaffusa, uschia ha communitgà la polizia chantunala da Schaffusa. Sia mira saja stada da far in'attatga en ils biros da la cassa da malsauns CSS che sa chattan en quest bajetg. Dus collavuraturs da la CSS èn vegnids blessads, almain in da quels grevamain.

RR novitads 14:00