Siglir tar il cuntegn

Header

cuntegn

Svizra Tribunal federal suonda quel da la Communitad europeica

Cu ina dunna na po betg pli lavurar tant sco avant pervi da l'uffant, na po l'assicuranza d'invaliditad betg stritgar u sbassar la renta. Il tribunal da la Communitad europeica aveva sentenzià che quai na saja betg confurm tenor la Convenziun europeica dals dretgs umans.

Sch'il pensum da lavur d'ina persuna ch'è parzialmain invalida vegn reducì pervi d'ina naschientscha, na po l'assicuranza d'invaliditad betg vegnir sbassada. Quai ha il Tribunal federal a Lausanne decidì. Cun questa decisiun realisescha il tribunal la metoda da mesiraziun per rentas d'invaliditad tar mammas che lavuran parzialmain. Tenor la Convenziun europeica dals dretgs umans (EMRK) han els stuì adattar quai.

Sbassà la renta d'ina mesa sin ina quarta.

En il cas concret è stada pertutgada ina turitgaisa da 41 onns. Suenter la naschientscha da ses uffant era la renta vegnida sbassada d'ina mesa renta sin ina quarta. Sia renta n'era suenter la naschientscha da l'uffant betg pli vegnida quintada tenor ina plazza da 100%. Da nov valeva questa dunna sco ina persuna che lavura parzialmain cun in uschenumnà champ d'incumbensas (tgira d'uffants).

Il tribunal da la Communitad europeica per dretgs umans ha sentenzià questa metoda da mesiraziun sco discriminanta en in auter cas il favrer 2016. Questa metoda vegn en funcziun bunamain mo tar dunnas che lavuran suenter la naschientscha d'in uffant mo pli parzialmain. Sco consequenza ha il Tribunal federal revedì sia decisiun il december 2016.

Adattà la decisiun a la Convenziun europeica dals dretgs umans

En il cas dal favrer 2016 aveva la dunna pers dal tuttafatg ses dretg da survegnir ina renta. En il cas da la turitgaisa ha il Tribunal federal ussa decidì ch'era sbassar la renta cuntrafetschia a la Convenziun europeica dals dretgs umans. La dunna haja vinavant il dretg da survegnir la mesa renta d'invaliditad.

RR novitads 14:00

Artitgels legids il pli savens