La Svizra na dastga betg trametter in Afgan enavos en sia patria, quai ha decis il Tribunal europeic dals dretgs umans a Strasbourg. La raschun è che l'um è convertì en Svizra tar il cristianissem e fiss perquai en privel en l'Afganistan.
Il Tribunal administrativ federal aveva refusà il recurs da l'um cunter sia expulsiun. En sia sentenzia da l'october 2016 è la dretgira a Son Gagl dentant vegnida a la conclusiun che la conversiun da l'Afgan tar il cristianissem saja credibla. En sia patria na saja el pervia da sia cretta dentant betg periclità. Ed er sche l'um na possia betg turnar en ses lieu d'origin, sche possia el bain viver a Kabul, nua ch'el haja augs e cusrins. Quels na sappian nagut da la nova religiun da l'um, uschia il Tribunal administrativ.
Betg examinà avunda la situaziun
Il Tribunal a Strasbourg accentuescha en sia sentenzia, ch'il Tribunal administrativ federal n'haja betg examinà avunda la situaziun dal recurrent. Il tribunal haja en pli negligì ils numerus documents, che documenteschian che cristians vegnan persequitads en l'Afganistan e ch'els stoppian quintar cun la paina da mort.
Ina expulsiun da l'um manass tenor il Tribunal europeic dals dretgs umans a quai, che l'um pudess be pli viver sia religiun en il zuppà. Contacts cun auters cristians fissan per el quasi nunpussaivels ed el stuess adina viver cun la tema ch'el vegniss traplà pervi da sia religiun.
Ultra da quai n'haja il Tribunal administrativ federal insumma betg resguardà che l'um tutgia tar la gruppa etnica dals Hazara. Quella vegnia gia dapi ditg discriminada en l'Afganistan.
Ord l'archiv da SRF:
Il december 2018 ha l'emissiun Kontext da Radio SRF prendì sut la marella il svilup dals dretgs umans.
RR novitads 14:00