Siglir tar il cuntegn

Header

Navigaziun

40% dals dumandads vuschassan cun in «segir gea» per l'iniziativa.
Legenda: 40% dals dumandads vuschassan tenor gfs.bern cun in «segir gea» per l'iniziativa. RTR
cuntegn

Svizra Trend positiv per iniziativa «Per la lètg e la famiglia»

La Partida populara svizra sustegn l'iniziativa da la Partida cristiandemocratica «Per la lètg e la famiglia». A chaschun da la radunanza da delegads da la PPS a Wil han 334 delegads vuschà per l'iniziativa, 25 cunter quella.

L'iniziativa «Per la lètg e la famiglia» vul eliminar dischavantatgs per pèrs maridads. Tenor retschertgas da l’institut gfs.bern vuschassan 67% dals burgais svizzers per u plitost per l’iniziativa. Entant sa mussan las vuschs cunter l’iniziativa flaivlas, cun totalmain be 21%. Ina pitschna part da 12% dals dumandads n’ha anc betg prendì ina posiziun.

Parlament è cunter l'iniziativa

En las disposiziuns finalas dal Cussegl naziunal è l’iniziativa vegnida refusada cun 107 cunter 85 vuschs. En il Cussegl dals chantuns medemamain, qua cun 25 cunter 20 vuschs. Il parlament n’ha uschia betg suandà il giavisch dals iniziants da l’iniziativa. Il Cussegl federal aveva l’emprim ditg gea al project da votaziun – pir suenter ha el refusà el.

Ils adversaris da l’iniziativa vegnan cunzunt da las varts da la PS, PLD, PES e PVL. L’unitad per l’iniziativa furman la PCD e la PPS. La Partida burgais-democratica PBD sa preschenta actualmain spartida.

Adversaris en atgnas retschas tar la PS

Il president da la Partida socialdemocratica Christian Levrat fa quitads sch'el vesa, quant sustegn l'iniziativa «per la lètg e la famiglia» survegn.

I inquieteschi el, che schizunt la mesadad dals simpatisants da la PS approveschian l'iniziativa da la Partida cristiandemocratica, ha ditg Levrat envers la «SonntagsZeitung». L'iniziativa saja ina cugliunaria. Tar famiglias cun uffants profitassan be pèrs cun in'entrada netta da passa 190’000 francs.

Ils auters projects fissan er approvads, ma betg tuts tuttina cler.

RR novitads 16:00 / 24.01.2016, 12:00

Il studi

La retschertga sin incumbensa da la SSR SRG ha fatg l'institut da perscrutaziun gfs.bern tar 1'213 persunas cun dretg da votar en Svizra. Las persunas tschernidas represchentativamain han respundì tranter ils 11. e 15. da schaner 2016.