Siglir tar il cuntegn
Inhalt

Svizra Transparenza – ma betg memia blera

Ils cussegliers naziunals na duain betg stuair inditgar lur patrun e tut ils invits da lobists.

In osp observa la debatta dal Cussegl naziunal.
Legenda: In zic transparenza tanscha. In osp observa la debatta dal Cussegl naziunal. Keystone

Avair transparenza saja fitg impurtant, di il cusseglier naziunal cristiandemocratic Martin Candinas. I dettia dentant era cunfins. «I na po betg esser che nus stuain lura laschar giu las chautschas e mussar tut quai che nus faschain e survegnin.»

Gia oz ston ils parlamentaris inditgar en in register public tut ils mandats ch'els han. Ina minoritad leva schlargiar quai register. Ils parlamentaris avessan lura era stuì inditgar sch'i sa tractia d'in uffizi d’onur ni sch'els survegnian per quell'incumbensa in'indemnisaziun annuala da dapli che 12'000 francs. Per Martin Candinas va quai memia lunsch. «Quai na sto in emploià er betg. E la fin finala duai la populaziun decider a maun da quai che nus faschain e da noss uffizis, sche nus essan supportabels u betg.» Da la medema opiniun è er stada la maioritad dal parlament ed ha stritgà quella passascha ord la lescha.

Betg dapli transparenza tar mandats

In pau auter vesa quai Heinz Brand da la PPS. El n’haja nagut cunter sch’ins stoppia declerar ils mandats d’onur ni quels pajads. «Quai tutga tenor mai era tar las chaussas ch’ins po relevar.» Ch'ins stoppia dentant era anc inditgar la summa ch'ins survegnia, quai che in'autra minoritad leva francar en la lescha, gliez è er per Brand memia blera transparenza.

Auter sch'i va per ils viadis dals parlamentaris. Qua sustegnan tant Candinas sco era Brand la proposta da la cumissiun, da nudar en in register public ils viadis ch'ils elegids fan en l'exteriur e che vegnan pajads dal parlament. El enconuschia qua intginas nursas nairas – era en l’atgna partida – che maldovrian quellas pussaivladads, di Brand. «Igl è trist ch’i dat collegas che dovran quellas obligaziuns da viagiar per ils interess persunals.» In register portia qua transparenza e mussia sch’insatgi fetschia viadis che n’hajan da far pauc cun ses uffizi.

Viadis privats restan privat

Ch'era viadis pajads dad auters stadis, da gruppas d'interess e da lobists duessan vegnir nudai en quai register, ina proposta da la sanestra, vulan omadus parlamentaris grischuns dentant betg. Tenor Martin Candinas hajan els l’obligaziun da vegnir tar infurmaziuns. «Co nus vegnin tar quellas infurmaziuns e tge che nus faschain duai esser en nossa responsabladad. Nus savain che medias rapportan adina puspè da viadis che han gì lieu e van era suenter a quai.»

Sch’insatge na saja betg correct vegnia quai baud u tard a la glisch. E lura possia quel a chasa decider sch'el veglia anc ina giada eleger quella persuna. Da la medema opiniun è stada er la gronda part da la chombra pitschna ed ha stritgà quella passascha.

RR actualitad 17:00