Siglir tar il cuntegn

Svizra Transfurmar stallas tar abitaziuns duai vegnir pli simpel

Il chantun duai pudair decider sche stallas e clavads che na vegnian betg pli utilisads dastgan vegnir transfurmads en abitaziuns. Il Cussegl naziunal è d'accord cun il Cussegl dals chantuns, ch'ha gia approvà quai il mardi.

Clavad a Riom.
Legenda: 20'000 stallas e clavads na vegnan en Svizra betg utilisads. Keystone

Il Cussegl naziunal ha approvà la moziun da la cumissiun d'ambient e planisaziun da la chombra pitschna. Quella prevesa ch'il chantun possia lubir da transfurmar stallas e clavads en abitaziuns. Dentant mo sut cundiziuns specificas: Ils chantuns ston damai decider da cas tar cas. 98 dals cussegliers naziunals èn sa declerads d'accord cun quai, 95 encunter e 2 èn s'abstegnids.

La chombra gronda vul dentant ch'ins differenzieschia cleramain schi sa tractia da territori da construcziun. Las decisiuns chantunalas duain sa basar sin la planisaziun regiunala e meglierar ils secturs natira, cultura, cuntrada ed agricultura. Uschia turna la moziun adattada en la chombra pitschna, ch'aveva il mardi approvà la moziun.

Supplica dals chantuns muntagnards

Basa da la moziun èn duas iniziativas chantunalas ch'han fatg naufragi en tuttas duas chombras. Il chantun Grischun ed il chantun Vallais avevan pretendì la lubientscha per la transfurmaziun, sch'ins respectia l'identitad dals edifizis. Quai era memia radical per ils cussegls.

Ozendi pon clavads e stallas mo vegnir transfurmadas en abitaziuns sut cundiziuns strictas.

RR novitads 12:00