Siglir tar il cuntegn
cuntegn

Svizra Transfurmar stallas e clavads duai vegnir pli simpel

Aclas, stallas ed auters bajetgs agriculs betg pli duvrads duain pudair vegnir transferids pli simpel en abitaziuns. Suenter il Cussegl dals chantuns è uss er la cumissiun dal Cussegl naziunal UREK s'exprimida per schluccar las reglas dador las zonas da bajegiar.

Dus clavads sin in prà alpin.
Legenda: Clavads sur Calfreisen en il Scanvetg. Keystone

Perquai propona la cumissiun dal Cussegl naziunal UREK a ses cussegl d'approvar la moziun or dals Cussegl dals chantuns, rapporta l'agentura da novitads svizra SDA.

Transfurmar gea, dentant be sche la situaziun cumpletta vegn meglra

Quella pretenda ch'ils chantuns possian lubir la midada da diever – permess che quella è prevesida en lur planisaziun. La cumissiun vul però segirar, ch'il terren da cultura vegn mantegnì. Perquai ha ella decidì da precisar il text da la moziun.

Ella vul avair integrà, che la planisaziun regiunala haja dad ameglierar la situaziun cumpletta pertutgant natira, cultura, cuntrada ed agricultura.

Grischun e Vallais han dà stumpel inizial

Basa dalas discussiuns en il parlament èn iniziativas dals chantuns Grischun e Vallais. Quellas pretendevan da pudair nizzegiar bajetgs agriculs betg pli duvrads ordaifer la zona da bajegiar cun mesira sco abitaziuns.

Quai va massa lunsch a la cumissiun dal Cussegl naziunal. Perquai pretenda ella cun 15 a 9 vuschs da la chombra gronda da far sco la chombra pitschna e e dir «na» a las iniziativas dals chantuns.

RR novitads 16:00+