Siglir tar il cuntegn

Header

cuntegn

Svizra Transfurmar hotels era ordaifer la zona da construcziun

Il Cussegl naziunal ha approvà ina moziun che vul, ch’ins po engrondir e transfurmar hotels ed auters bajetgs che sa chattan ordaifer la zona da construcziun. Resistenza cunter la midada da la lescha hai dà da vart politica sanestra: La moziun promovi la construcziun sparpagliada zuppada.

audio
Saira: Reglas pli luccas per hotels ordaifer la zona da construcziun
ord Actualitad dals 12.09.2016.
laschar ir. Durada: 3 minutas 8 Secundas.

Sco segunda chombra parlamentara ha er il Cussegl naziunal approvà ina moziun che vul far pussaivel d’engrondir e transfurmar hotels e ulteriurs bajetgs ordaifer la zona da construcziun.

Per il Cusseglier dals chantuns grischun Martin Schmid è cler che quai dovra tar la lescha per la planisaziun dal territori urgentamain midadas. En il Grischun hajan ins en blers territoris da skis ni els auts bajetgs ch’ins veglia modernisar ed adattar als basegns actuals.

Il mument impedeschia la lescha federala quai. «Quellas reglas èn vegnidas stgaffidas per reglar l’engrondiment e la midada d’utilisaziun d’aclas e mises. Quellas èn fitg restrictivas ed impedeschan ussa era in svilup turistic.» Perquai sustegn Schmid la moziun che vul schluccar las perscripziuns.

La sanestra vul leschas pli severas

Tut auter la Cussegliera naziunala grischuna Silva Semadeni. Avant trais onns haja la populaziun svizra votà cun 63% da las vuschs per ina lescha per la planisaziun dal territori pli severa. «Quai è la finamira da la lescha, cunzunt ordaifer la zona da construcziun. D’empruvar da stgaffir excepziuns anc pli grondas n’è betg in avantatg. Ni per la Svizra, ni per il Grischun ed il turissem.»

La situaziun è sa midada

La situaziun saja ussa in'autra, ha ditg Schmid. Il turissem saja ella crisa. I dovria novs projects innovativs che carmalian novs osps en las muntognas svizras. La lescha per la planisaziun dal territori restrenschi qua memia fitg.

«I n’è betg l’intenziun da bajegiar insatge sin la prada verda mabain là nua ch’i è gia insatge ed uschia da rinforzar il turissem. Il chantun Grischun dovra investiziuns. Nus stuain tegnair actual las purschidas turisticas. Ils osps uschiglio el Tirol sch’els chattan là las purschidas ch’els tschertgan e sche nus na pudain betg concurrer.»

Dapli libertad–dapli plazzals–dapli disturbi

Dapli libertad porti dentant dapli plazzals da bajegiar sin aclas e pizza e saja in nausch servetsch per il turissem, admonescha Semadeni.

«Quai è trid per la cuntrada, quai è ina ipoteca per il futur. Midar la lescha na porta nagins avantatgs per il turissem.»

Davos las stentas da vart burgaisa vesa ella cunzunt ina raschun. Agens interess. Ed Semadeni vegn concreta. «Jau sai exactamain d’in cas en il Grischun nua ch’ins vul vairamain far quai, nua ch’era il Cusseglier dals chantuns Martin Schmid è involvì.»

I va per il project d'engrondiment dal «Bike-Hotel Mundaun» a Sursaissa ch'è bloccà il mument tras il Tribunal federal. Martin Schmid è l'advocat da la possessura da l'interpresa Bianchi SA.

Ma Martin Schmid sa dosta cunter talas rinfatschas. «I va per la chaussa. E sch’ins n’ha nagins arguments pli lura vegn giugà sin la persuna!» ha ditg Schmid.

RR actualitad 17:00

Artitgels legids il pli savens