Siglir tar il cuntegn

Header

Navigaziun

purtret da Cla Riatsch
Legenda: Cla Riatsch, il professer actual va en pensiun. RTR, Gion Hosang
cuntegn

Svizra Trais persunas vulan succeder a Clà Riatsch

La fin da l'onn 2017 va en pensiun Clà Riatsch, il professer per litteratura rumantscha a l'universitad da Turitg. Per sia successiun ha la facultad filosofica da l'universitad envidà trais persunas che han da tegnair in referat d'emprova: Annetta Ganzoni, Rico Valär e Renzo Caduff.

purtret da Annetta Ganzoni
Legenda: Annetta Ganzoni mad

Annetta Ganzoni ha l'annada 1958, è creschida si a Schlarigna. L'Engiadinaisa ha emprendì scolasta secundara avant ch'ella ha studegià romanistica a Turitg, Berna e Genua. Dapi 20 onns è Annetta Ganzoni collavuratura da l'archiv svizzer da litteratura, publitgescha adina puspe diversas contribuziuns, organisescha e moderescha er dietas ed occurrenzas davart litteratura rumantscha e taliana. En ses referat da candidatura tracta ella «la prosa bilingua da Andri Peer».

purtret da Renzo Caduff
Legenda: Renzo Caduff mad

Renzo Caduff è da l'annada 1975 e creschì si a Mustér. Era el ha fatg l'emprim magister secundar avant ch'el è sa deditgà pli intensiv al linguatg rumantsch. Gl'emprim a l'universitad da Fribourg. El viva actualmain en la Svizra franzosa ed è dapi l'avust 2014 assistent superiur per rumantsch a l'universitad da Turitg. Vitiers è Renzo Caduff engaschà per 40% sco «chargé de cours» per romontsch a l'universitad da Genevra. Era el publitgescha adina puspe. Sia davosa gronda publicaziun è stà l'ovra cumpletta dal scrivent Alfons Tuor. Caduff referescha en sia prelecziun davart «Mimesis e giug, fenomens da contacts da lungatg en texts romontschs».

purtret da Rico Valär
Legenda: Rico Franc Valär RTR

Sco terz candidat, dentant l'emprim che dastga far sia prelecziun il favrer a l'universitad da Turitg, vegn Rico Valär. Cun l'annada 1981 è el il giuven tranter ils trais candidats. Valär è oriund da Zuoz, ha studegià romanistica cumparativa, rumantsch e litteratura franzosa a l'universitad da Turitg. El lavura sco editur, recensent e translatur. Actualmein lavura el tar l'Uffizi federal da cultura a Berna. El tegn sia prelecziun davart il tema «Chara lingua da la mamma - chara mamma da la lingua - l'auzament litterat da la lingua materna tar la renaschientscha da las linguas pitschnas rumantschas».

RR actualitad 12:00