Siglir tar il cuntegn
Inhalt

Svizra Traffic tschessa sin vias en Grischun e davant Gottard

Suenter colonnas da pliras kilometers e temps da spetga da pliras uras, è il temp da spetga sin las vias en il Grischun e davant il Gottard sin svanir. La situaziun para da sa normalisar.

Ina colonna d'autos sin l'autostrada dal Gottard.
Legenda: Per viagiar cunter il sid dovri pazienza. Keystone

Sin las rutas en il sid para la situaziun dal traffic da sa normalisar. Quai suenter che las rutas dal Gottard e dal San Bernardin è stadas surchargiadas e stuppadas durant pliras uras. Mo anc sin l'autostrada A13 èsi da quintar ch'il traffic stagnescha tranter Andeer ed il tunnel dal San Bernardin.

Kilometers ed uras da spetga aveva quai dà

Avant il tunnel dal Gottard hai dà en il decurs da la sonda colonnas da fin 15 kilometers e pliras uras temp da spetga. L'autostrada tras il Grischun sur il San Bernardin ha gì traffic stagnant sur pliras uras. Da Landquart fin a Pian San Giacomo hai adina puspè dà colonnas.

Problems tras accident era a Cuira

Pervia d'in accident stagneva il traffic tras la citad da Cuira per radund 2 uras. Sin l'access nord a l'lautostrada A13 era in motociclistcollidà cun in auto. Il manischunz dal töff è vegnì blessà mezgrev, communitgescha la polizia chantunala.

Pervia da l’accident aveva la polizia serrà l’access a l’A13 a Cuira nord en direcziun sid.

RR novitads 15:00