Traffic public vegn pli char – però be in zic

Ils pretschs per il traffic public creschan vinavant – en media per 3%. Per cumpensar quest augment èn il survegliader dals pretschs e la branscha dal traffic public sa cunvegnids ad in pachet da mesiras. Dals radund 50 milliuns francs profitescha cunzunt tgi che posseda in abunament general.

Il survegliader dals pretschs, Stefan Meierhans.

Legenda da maletgs: Il survegliader dals pretschs, Stefan Meierhans. Keystone

Ils pretschs auts per bigliets dal traffic public duain vegnir cumpensads per part. Il survegliader dals pretschs Stefan Meierhans è sa cunvegnì cun la branscha dal traffic public «ch-direct» ad in pachet da mesiras per cumpensar l'augment dals pretschs d'en media 3%.

Carta da juniors custa la mesadad

Sco quai che Meierhans ha communitgà muntia il pachet da mesiras a radund 50 milliuns francs. Cun in rabat po tranter auter quintar tgi ch'ha in abunament general. Il rabat vala sche l’abunament vegn prolungà senz’interrupziun.

Ultra da quai vegn pli bunmartgada la carta da juniors. Ella custa da nov 15 empè da 30 francs. Plinavant datti er ina nova carta d’accumpagnament per uffants, medemamain per 15 francs. L’uffant na sto betg esser parent cun la persuna creschida.

Cumpensar effect da 100 milliuns francs

Gia il 2013 aveva quai dà in augment da 200 milliuns francs dals pretschs dals trassés. Quai aveva procurà per pli chars bigliets da traffic public.

Per l'onn 2017 munta la revisiun da pretschs da trassés a 100 milliuns francs, quai che maina a l'augment dals pretschs da bigliets d'en media 3%.

RR novitads 11:00

Tge è il pretsch da trassés?

Mintga viadi da tren custa als gestiunaris d’infrastructura. Binaris vegnan isads, sviaders e signals ston vegnir manevrads e tgirads. Las interpresas da traffic da viafier pajan als gestiunaris ina summa – il pretsch da trassés. L’autezza dal quest pretsch definescha il Cussegl federal. Ils 1 da schaner 2017 vegn quel auzà per 100 milliuns francs.