Siglir tar il cuntegn

Header

cuntegn

Svizra Traffic da persunas sin lingia da Gottard rolla puspè

Suenter che la lingia da viafier dal Gottard era anc bloccada l’avantmezdi, è in vial uss puspè avert per il traffic da viafier. Il tschancun era stà serrà pervi d’ina crudada da crappa la sonda saira. Sper ils trens da vitgira po er il traffic da persunas charrar tranter Erstfeld e Göschenen (UR).

Fin gievgia pon ils trens sin il tschancun pertutgà be charrar sin in vial, uschia la SBB. La sonda saira aveva ina crudada da crappa tar Amsteg-Silenen interrut la lingia da viafier dal Gottard. Latiers era vegnida donnegiada ina pitga electrica. Quella lingia da contact han ins pudì reparar fin il glindesdi.

Tranter Erstfeld e Göschenen era la lingia da viafier interrutta.
Legenda: Tranter Erstfeld e Göschenen era la lingia da viafier interrutta. SRF

Nagins blessads

Las lavurs cuntinueschan. Tranter auter sto la SBB reparar ils binaris da la vart sura, quai sin in toc da 2,2 kilometers lunghezza. Directamain pertutgà da la crudada da crappa è stà in ICN da Lugano a Turitg. Ils 180 passagiers eran vegnids evacuads; blessads n’avevi dà nagins.

RR novitads 14:00

Artitgels legids il pli savens