Siglir tar il cuntegn

Header

Navigaziun

Daniel Muenger, president da Syndicom, Daniel Lampart schef-econom da l'USS, Pierre-Yves Maillard, president da l'USS e Vania Alleva, predisdenta da la Unia durant la conferenza da medias a Berna.
Legenda: 2% dapli paja en general e surtut in cler auzament da paja per las dunnas, quai pretendan las associaziuns da l'Uniun sindicala svizra. Keystone
cuntegn

Tractativas da paja 2019/20 Uniun sindicala svizra pretenda 2% dapli paja

Surtut stoppia uss il dischavantatg da las dunnas tar las pajas vegnir curregì, ha ditg l'Uniun sindicala il venderdi ad ina conferenza da medias. Las interpresas hajan tuttavia spazi dad auzar uss las pajas.

Lavurantas e lavurants en Svizra duain survegnir dapli paja. Las associaziuns da l'Uniun sindicala svizra pretendan in augment da 2% en connex cun las tractativas da paja 2019/2020.

Surtut tar las pajas da las dunnas dovria ussa in plus considerabel, ha pretendì l'Uniun sindicala ad ina conferenza da medias. Il dischavantatg da las dunnas tar las pajas, stoppia uss vegnir curregì.

Ils davos trais onns saja l'economia svizra sa svilupada bain. Malgrà ch'ils emploiads hajan adina dapli da far, sajan las pajas realas dentant sa reducidas per 0,6%. Quai saja malgist e perecliteschia il svilup economic da la Svizra.

Auzar las pajas per mantegnair il consum

Il consum pro chau – senza resguardar ils custs da sanadad – saja dapi il 2015 sa sbassà real per radund 0,7%. Sche las pajas na vegnian betg auzadas considerablamain, vegnia quest svilup anc rinforzà, argumentescha l'Uniun sindicala.

Ord vista dals emploiads dovria l'auzament da las pajas per egualisar la chareschia da stgars 0,5% da quest onn sco er per finanziar las premias da las cassas da malsauns che vegnian adina pli charas.

Conjunctura è meglra che pretendì

Ord vista da l'Uniun sindicala datti tuttavia spazi per auzar las pajas. La conjunctura svizra saja sin meglra via che quai che blers hajan pretendì las ultimas emnas. Las interpresas tschertgian uschè blers impiegads sco dapi 10 onns betg pli.

En bunamain tut las branschas saja la situaziun da fatschenta buna. Er en l'industria ch'haja gì da sentir il sbassament da la conjunctura internaziunala, saja la situaziun da fatschenta per gronda part positiva. La bleras interpresas quintian da pudair exportar dapli ils proxims mais.

RR novitads 11:00