Siglir tar il cuntegn

Header

cuntegn

Svizra Tortura per animals è a fin – la polizia serra bain puril

En la Turgovia schlian las autoritads per immediat il bain dal commerziant da chavals, che vegn suspectà d'avair torturà animals. Quai ha ina task force dal chantun Turgovia decidì il glindesdi.

La davos'emna era vegnì enconuschent, che var in tozzel chavals eran crappads ils davos mais sin il bain dal commerziant da chavals a Hefenhofen. Ulteriurs animals eran smagregiads e stuevan mangiar paun da miffa, sco ina dunna ch'enconuscheva dapi ditg il bain aveva documentà. La Procura publica da la Turgovia aveva confermà venderdi passà ch'ils maletgs sajan autentics ed actuals.

Controllas hai dà

Las autoritads hajan adina puspè fatg controllas sin il bain ils davos mais, ha ditg ad ina conferenza da medias cusseglier guvernativ Walter Schönholzer ch'ha manà la task force. Quellas sajan vegnidas annunziadas a curta vista, e lura hajan ils controlladers vis mancanzas che sajan silsuenter vegnidas meglieradas.

La sort dals animals

La task force ha decidì il glindesdi da reagir uschè spert sco pussaivel. Ils var 300 animals sin il bain, da quai var 90 chavals, vegnan evacuads. Fin ch'ils animals èn transportads davent, resta il bain puril sut observaziun da la polizia.

Ils chavals vegnan transportads en in center federal veterinar e per animals da l'armada en il chantun Berna. Ils ulteriurs animals – 100 portgs, 50 arments, nursas, chauras e lamas – vegnan evacuads cun involver martgadants d'animal.

Plirs plants èn sin maisa

Il commerziant da chavals suspectà è dapi glindesdi da mezdi en arrest. El coopereschia, ha la polizia chantunala ditg. L'um prechastià na dastga betg pli tegnair animals. Ed i dat plirs plants cunter el pervi da tortura d'animals ed auters delicts, ha ditg il cumandant da la polizia chantunala da la Turgovia.

RR novitads 17:00 ++

Artitgels legids il pli savens