Siglir tar il cuntegn
Inhalt

Svizra Tiana Moser na vul betg vegnir presidenta dals Verd-liberals

Quai ha la cussegliera naziunala ditg en in'intervista cun la gasetta Tages Anzeiger. La dunna da 38 onns da Turitg valeva sco ina da las favuritas.

Tiana Angelina Moser durant in pled en il Cussegl naziunal.
Legenda: Tiana Angelina Moser durant in pled en il Cussegl naziunal. Ella vul restar presidenta da la fracziun enstagl da daventer presidenta da la Partida verd-liberala. Keystone

Ella na possia betg ademplir la rolla da la presidenta sco i fiss necessari per la partida, ha ditg Tiana Angelina Moser. La partida dovria insatgi che fetschia sper la lavur en la publicitad er lavur da bajegiar si las partidas localas e chantunalas. Quai dovria bler temp er las sairas e las fins d'emna. Ina sfida che vegnia anc pli gronda l'onn d'elecziuns. Sco presidenta da la fracziun possia ella lavurar pli flexiblamain. Quai haja influenzà sia decisiun.

Ultra da quai avess ins en in cas d'ina candidatura da Tiana Angelina Moser er stuì tschertgar insatgi nov per il presidi da la fracziun - quai na fiss tenor ella betg stà ideal.

Uss valan Kathrin Bertschy e Jürg Grossen, dus cussegliers naziunals da Berna sco favurits, scriva l’agentura da novitads svizra. Il president actual Martin Bäumle ha annunzià da remetter ses uffizi. El è stà dapi la fundaziun da la Partida verd-liberala il 2007 president da partida.

RR novitads 10:00