Siglir tar il cuntegn

Svizra TI: Posts da cunfin restan serrads

Dapi l'emprim d'avrigl èn trais posts da cunfin pli pitschens serrads durant la notg e quai duai restar uschia.

Il cunfin a Novazzano resta serrà mintga di davent da las 23:00 enfin las 5:00 uras.
Legenda: Il cunfin a Novazzano resta serrà mintga di davent da las 23:00 enfin las 5:00 uras. Keystone

Il cusseglier federal Ueli Maurer na vul betg interrumper quest project da pilot. En la Samstagsrundschau da radio SRF ha el - per l’emprima giada - prendì posiziun en connex cun la critica da l’Italia. La situaziun al cunfin en il sid da la Svizra saja tendida. I na saja dentant betg da survalitar la reacziun da l'Italia. Il parlament haja dà l'incarica d'analisar la situaziun e quai vegnia ussa fatg en la fasa da test da sis mais. La finamira dal project da pilot saja da chattar ora sch’i portia insumma insatge da serrar posts da cunfin la notg per reducir la criminalitad sur cunfin.

Ord protesta cunter quest project aveva il ministeri da l'exteriur talian cità il mardi passà l'ambassadur svizzer Giancarlo Kessler a Roma.

RR novitads 15:00