Siglir tar il cuntegn
Inhalt

Svizra Thurgovie en marche – franzos en scola primara resta

Il Cussegl grond da la Turgovia na stritga tuttina betg il franzos en scola primara. El ha approvà ina moziun da la partida social-democratica en quest senn.

Scolara en lecziun da franzos.
Legenda: Allez les enfants – in Turgovia resta il franzos rom da scola en primara. Keystone

Suenter ina debatta da radund duas uras la mesemna avantmezdi avevan gudognà ils social-democrats. Il parlament ha fatg la storta a piz ed ha votà cun 62 a 60 vuschs da tuttina laschar il franzos en scola primara. La lescha dispitaivla è uschia giud maisa.

Instrucziun insuffizienta e memia greva

Perquai che l’instrucziun da franzos en primara na saja betg suffizienta e surdumondia il scolars avevan ils adversaris vulì spustar il franzos da la scola primara en il stgalim aut.

Els avevan pretendì dad introducir in passus correspundent en la lescha da la scola populara turgoviana. Il parlament era seguì l’entschatta da matg a quella proposta cun 68 a 53 vuschs.

Critica ha para portà fritg

Suenter la decisiun, da na betg pli vulair il franzos en scola primara, era la Turgovia vegnida crititgada da tut las varts. 2 emnas pli tard aveva la directura da l’educaziun Monika Knill preschentà ina seria da meglieraziuns cun la speranza da pudair salvar il franzos en la scola primara anc en l’ultima minuta.

RR novitads 14:00