Cun 36 onns è Thomas Aeschi il pli giuven candidat che la Partida populara svizra (PPS) propona per il Cussegl federal. Il cusseglier naziunal dal chantun Zug represchenta la nova generaziun dals politichers da la PPS, che sa mussan averts, intellectuals e dinamics.
Sveglià l'interess politic ha tar Thomas Aeschi la votaziun federala davart il «Spazi economic europeic» (EWR) il 1992. Da lezzas uras aveva Aeschi 13 onns. Pli tard ha el studegià en la Malaysia, a Tel Aviv, a Son Gagl ed a Harvard e lavura oz sco cussegliader da fatschentas.
Il 2009 è Aeschi entrà en la PPS ed ha fatg carriera spert: l'emprim en il chantun Zug, e dapi il 2011 sin plaun federal sco cusseglier naziunal.
Aeschi na crai betg che l'Uniun europeica (UE) visassia las cunvegnas bilateralas, sche la Svizra reducess la libera cirulaziun da persunas. Las bilateralas sajan memia avantagiusas per l'UE, manegia Aeschi.