La fracziun da la Chasa federala da la PPS ha elegì il cusseglier naziunal, Thomas Aeschi sco nov president. Aeschi ha stuì sa metter tras cunter Werner Salzmann (BE). Il terz candidat Alfred Heer è sa retratg curt avant l'elecziun. Aeschi suonda Adrian Amstutz che ha dà giu ses post suenter sis onns.
Aeschi è dapi l'onn 2011 cusseglier naziunal. Vegnì enconuschent en la publicitad è el l'onn 2015, cura ch'el ha candidà per la successiun da cussegliera federala Eveline Widmer-Schlumpf. In motiv che sia emprova haja fatg naufragi, saja ch'el haja uschè bunas relaziuns cun Christoph Blocher, il schef-strateg da la PPS. Vegnì elegì è lura Guy Parmelin.
Disciplinà ed organisà
Thomas Aeschi è econom e lavura sco cussegliader d'interpresa a Turitg. En il cussegl naziunal è el commember da la cumissiun per economia e taglias ed en la cumissiun da finanzas. El fetschia dentant er regularmain part da la politica d'immigraziun. Aeschi vala sco disciplinà e bain organisà. Quai pudess vegnir dal bun ad el sco schef da la pli gronda fracziun en Chasa federala.
Heer è sa retratg surprendentamain
L'um dal chantun da Zug ha stuì sa metter tras cunter be in concurrent, Werner Salzmann. Il terz candidat Alfred Heer è surprendentamain sa retratg curt avant l'elecziun.
Heer è dapi il 2007 cusseglier naziunal. El è president da la cumissiun da gestiun e president da la delegaziun per il Cussegl da l'Europa. Avant ha el blers onns presidià la partida chantunala da Turitg.
Era Salzmann è president da la partida chantunala da Berna. En il Cussegl naziunal è el dapi il 2015. Sa fatg in num ha el cun la politica da segirezza e sco adversari da leschas pli strictas per armas.
Unir la fracziun
Pensum dal nov schef da fracziun èsi dad unir la fracziun. Quella cumpiglia 74 commembers, dus da quels appartegnan a la Lega dei Ticinesi, in al Mouvement citoyens genevois ed in a nagina partida. Plinavant è il schef da fracziun responsabel per la communicaziun e la coordinaziun cun las autras fracziuns.
Era la PLD elegia oz in nov schef da fracziun. Sulet candidat per suandar Ignazio Cassis è il cusseglier naziunal da Turitg, Beat Walti.
RR novitads 17:00