Siglir tar il cuntegn
Inhalt

Svizra Tgi ha registrà il pled dispitaivel da Blattmann?

Il schef da l’armada smaladì ina contribuziun da la «Rundschau». En la stanza eran 150 uffiziers dal Stab general. Insatgi ha registrà il pled da Blattmann. Tenor il Departament federal da defensiun DDPS è quai in delict. Uss investighescha la giustia militara.

La registraziun dal pled da Blattmann è ord vista dal DDPS in delict.
Legenda: La registraziun dal pled da Blattmann è ord vista dal DDPS in delict. Keystone

La registraziun dal pled dispitaivel dal schef da l’armada André Blattmann cunter ina contribuziun da la «Rundschau» ha consequenzas giuridicas. En il focus na stat betg Blattmann, mabain quella persuna che ha registrà ses pled. La giustia militara prenda provisoricamain si cumprovas cunter nunenconuschent.

«Il pled ha gì lieu en in circul serrà, i valeva il dretg a l’agen maletg e tun», ha ditg il schef da communicaziuns dal DDPS Daniel Reist. Ord quest motiv vala ina registraziun sin portatuns senza permissiun dals participads sco delict.

Reist ha uschia confermà in rapport da las gasettas «Zentralschweiz am Sonntag» e «Ostschweiz am Sonntag». La giustia militara vegn en acziun tar il suspect che commembers da l’armada en servetsch han commess in delict.

Fin 180 taxas per di

Ils chastis che smanatschan al culpabel commember da l’armada èn reglads en il dretg militar: En levs cas tanschan las sancziuns da l’admoniziun sur ina multa fin a l’arrest.

En grevs cas smanatscha in chasti monetar da fin 180 taxas a di. Tar insatgi che gudogna bain po quai uschia muntar a plirs dieschmilli francs.

Avant passa 150 uffiziers dal Stab general era Blattmann s’exprimì l’entschatta matg diramain sur d’in infurmant. Quel duai avair dà a medias infurmaziuns sur da sproposits davart il project per il nov sistem da defensiun da l’aria BODLUV. Quel è entant vegnì sistì.

RR novitads 18:00