Siglir tar il cuntegn
Inhalt

Svizra Tgi che absolvescha betg tut ils dis dal servetsch militar paja

Tgi che vegn relaschà dal servetsch militar senza avair absolvì tut ils dis da servetsch, sto da nov pajar. Dentant na vul il Cussegl naziunal betg retrair il pass a tals che pajan betg las taxas.

Persunas en il militar.
Legenda: Il pass na vegn betg retratg a tals che na pajan betg las taxas. Keystone

Il Cussegl naziunal ha suandà la Cumissiun per la politica da segirezza en tut ils puncts. En la votaziun generala ha el la mesemna acceptà las novas reglas per l'exemziun dal servetsch militar – senza cuntravuschs. Propostas per midadas cuntinuantas èn dentant vegnidas refusadas.

Uschia è il Cussegl naziunal s'exprimì cun 120 tar 62 vuschs cunter la proposta che las autoritads possian en futur retrair il pass a tals che na pajan betg las taxas pendentas. Priska Seiler Graf (PS) ha numnà la proposta «grotesca e sproporziunada». L'adattaziun cuntradia a fixaziuns dal dretg internaziunal.

Daners per dis da servetsch scrudads

En ils davos onns èn in pèr milli persunas vegnidas relaschadas dal servetsch militar senza avair absolvì tut ils dis da servetsch.

En futur duain ils pertutgads pajar sche pli che 15 dis servetsch militar u 25 dis servetsch civil n'èn betg vegnids absolvids. Blers hajan betg dad absolver tut ils dis, perquai ch'i vegnian betg clamads.

Uschia stgaffin nus dapli egualitad.
Autur: Ueli MaurerCusseglier federal (PPS)

La taxa minimala resta 400 francs

Il servetsch militar u civil vegn absolvì tranter il 19avel, 20avel e 37avel onn da vegliadetgna. Correspundentamain duai er la durada da las taxas vegnir adattada. En ils 18 onns da servetsch duain ils pertutgads vinavant pajar maximalmain 11 taxas cun ina tariffa da taxa da 3% da l'entrada netta e minimalmain 400 francs.

La proposta da la gruppa da studi dal sistem d'obligaziun da servetsch, d'augmentar la taxa minimala sin 1000 francs n'è betg vegnida acceptada. La PS ed ils verds han pledà per in sistem da «taxas progressivas». In sistem che resguardass las entradas imponiblas. Er questa proposta ha dentant fatg naufragi.

Ussa va il project da votaziun en la chombra pitschna. Finamira fiss che las midadas giessan en vigur l'entschatta 2019.

RR novitads 15:00