Siglir tar il cuntegn
cuntegn

Svizra Tge animal pitschen è quai?

En Svizra datti 90 sorts mammals che vivan en libertad. Entant ch’ins sa ina massa dal luf-tscherver, da tschiervs e da vulps, san ins mo pauc da stgilats, erizuns ed utschels-mezmieur. Quai less la societad svizra da biologia da la fauna midar cun in nov atlas dals mammals.

In stgilat mangia ina nusch.
Legenda: È il stgilat periclità u betg? Keystone

Malgrà che l’uman è atgnamain era in mammal, n’èn ils mammals en Svizra betg perscrutads bain. U almain tschertins. Dals gronds mammals sco luf ed urs san ins bler, perquai ch’els èn preschents, els chaschunan conflicts, di professer Roland Graf. Ils pitschens vivan en il zuppà. Graf maina la gruppa da lavur dal nov atlas.

Il vegl atlas è antiquà

Gia avant passa 20 onns è il vegl atlas da mammals cumparì. La finamira dal nov atlas è da mirar, tge animals che vivan nua, e co. Datti forsa animals ch’en periclitai, forsa il stgilat? Per las perscrutaziuns èn ils scienziads visads sin l’agid da tuts.

Trametter mieurs cun la posta

Centers da cumpetenza rimnan tut las infurmaziuns da la populaziun, fotografias e schizunt pitschens animals morts. Quels vegnan analisads en ils labors. Qua pudais vus annunziar vossas observaziuns, il link avra en ina nova fanestra. Il nov atlas duai cumparair l’onn 2020, ina finamira è da perscrutar ils animals ed uschia proteger els e lur spazi da viver.