Siglir tar il cuntegn

Header

cuntegn

Testar, testar, testar... Confederaziun lantscha nova campagna

La situaziun saja vinavant tendida ma sa stabiliseschia plaunet, uschia Virgine Masserey, la manadra da la secziun controlla d'infecziuns tar l'Uffizi federal da sanadad. Quai laschia guardar precautamain optimistic en l'avegnir. Però il dumber da mortoris na giaja anc betg enavos e pli e pli paucas persunas cun sintoms sa laschian testar.

En Svizra hai dà aifer las ultimas 24 uras 4'946 infecziun novas da corona. Vitiers annunzia l'Uffizi federal da sanadad ulteriurs 111 morts e 252 novas entradas en ospitals. En il Grischun èn las cifras actualas sin 75 novas infecziuns e 3 ulteriurs morts. Il mument sa chattan passa 950 persunas en quarantina e 580 en isolaziun.

Ins stoppia vinavant sbassar il dumber da novas infecziuns, uschia Virgine Masserey. Perquai lantscha la Confederaziun a partir da dumengia ina nova campagna che duai animar da sa laschar testar. Betg per mintga singul sintom, ma cunzunt tar sintoms enconuschents dal coronavirus sco tuss, problems da respirar, nagin gust euv.

  • I dettia avunda tests
  • Ils tests sajan dapertut e per tuts gratuits

Ils experts da la Confederaziun speran da pudair reducir vinavant il dumber da novas infecziuns sco er mortoris cun testar bler e cuntinuadamain. Quai saja necessari per erruir ed interrumper uschè svelt ed uschè bleras chadainas d'infecziun sco pussaivel. La nova campagna vegn lantschada la dumengia en las gasettas e sin auters chanals. Ella vegn era sustegnida da la Federaziun dals medis svizzers FMH e da la federaziun da las cassas da malsauns H+.

Envers la dumonda sch'ins possia gia puspè ponderar da schluccar las mesiras, p. ex. per emprovas da chors ch'èn actualmain anc scumandadas, èn ils experts critics. Sch'ins reageschia memia baud sin cifras positivas, sajan ins svelt en ina terza unda. Quai dovria temp, uschiglio saja il ristg grond che las cifras creschian puspè fitg spert.

Reducir ils contacts duas emnas avant Nadal

Cun reducir ils contacts avant Nadal, quasi ina quarantina ord libra voluntad, possian ins reducir il ristg da s'infectar e d'infectar auters durant la festa, uschia il medi chantunal dal chantun Basilea-Citad, Thomas Steffen. Uschia saja plitost pussaivel da tut tenor envidar geniturs u tat e tatta a la festa. Plinavant cusseglia el però da s'entupar maximalmain cun dus tegnairchasas e sa chapescha da resguardar las mesiras d'igiena e distanza. Quai valia er per las festivitads da Silvester. Tschaveras nua che tuts mangian ord ina chazzetta sco fondue da chaschiel u chinoise cusseglia il medi d'evitar.

RTR novitads 15:00

Artitgels legids il pli savens

Scrollar a sanestra Scrollar a dretga