L'uffizi federal da sanadad e la cumissiun federala per dumondas da vaccinar cusseglian ussa la vaccinaziun da rinfrestgament – l'usché numnà Booster per tuts – pia era per persunas sut 65 onns. La raschun è il dumber da las novas infecziuns che crescha.
En il medem mument ha Swissmedic, l'institut svizzer per products terapeutics da glisch verda per il booster cun il vaccin da Moderna per tut las persunas davent da 18 onns. Il booster, pia la terza dosa dal vaccin datti pero il pli baud in mez onn suenter la segunda dosa.
Fin uss han passa 350'000 persunas gia survegnì la vaccinaziun da rinfrestgament. I detti tenor il BAG radund 1,2 milliuns persunas pli veglias che 65 onns che han gia survegnì la vaccinaziun avant dapli che sis mais. Per quels duessi dar la vaccinaziun da rinfrestgament il november u december.
Persunas sut 65 onns han era sis mais suenter la vaccinaziun anc in bun schurmetg cunter ina grev'infecziun. Persunas giuvnas che s'infecteschian malgrà la vaccinaziun hajan il bia mo flaivels simptoms e na dattan betg vinavant il virus.