Siglir tar il cuntegn

Header

Navigaziun

Purtret da la charta Svizra cun ils epicenters dals terratrembels.
Legenda: La charta da l'ETH Turitg mussa quants terratrembels ch'i ha da ils ultims dis en Svizra e conturn. www.seismo.ethz.ch
cuntegn

Svizra Terratrembel en Svizra – da sentir era en il Grischun

En Svizra ha la terra stremblì questa saira da las 21:12.

Il terratrembel da la fermezza 4,6 saja stà da sentir en l'entir pajais, scriva il servetsch da terratrembel da l'ETH da Turitg. I saja in dals ferms terratrembels dals davos onns en Svizra.

L'epicenter è stà en il chantun Sviz, 6 kilometers en il nordost dal Pass dal Klausen. Pli tard è vegnì inditgà Linthal (Glaruna) sco lieu dal terratrembel. Cun terratrembels da questa fermezza saja pussaivel ch'i dettia donns pitschens fin mesauns en la vischinanza da l'epicenter. Questa giada hai per cletg dà paucs. Main che 10 annunzias da donns haja l'Assicuranza d'edifizis Glaruna survegnì.

Tant la polizia dal chantun Sviz sco er quella dal chantun Glaruna han confermà ch’i haja dà telefons da burgais inquietads, ma naginas annunzias da donns. La notg na possian ins dentant era betg vesair tut ils donns.

Il servetsch da terratrembel da la Svizra ha gia suenter curt temp publitgà la novitad sin lur portal da Twitter.

Terratrembels en Grischun n'èn nagut da rar

La seismologa Michelle Marti ha declerà ch'i dat en media 23 terratrembels ad onn en Svizra ch'ins po era sentir. L'onn passà ha la terra squassà 31 giada uschè ferm ch'ins ha sentì quai. Davent da la fermezza 2,5 saja quai normalmain il cas. L'ultim terratrembel ch'ins ha sentì en Grischun è stà l'october passà. Suenter il terratrembel da glindesdi saira hai da dapli che 20 terratrembels posteriurs, ha il servetsch seismologic svizzer communitgà.

Gist il Grischun la regiun dal Vallais ed a Basilea èn periclitads tras terratrembels. Mintga 50 enfin 150 onns dettia en Svizra terratrembels grevs, pia cun ina magnituda d'enfin 6. L'ultim terratrembel uschè ferm è stà en ils onns quaranta. Là eran trais persunas mortas.

È il chantun Grischun preparà bain per terratrembels?

Legenda: Guardar il video Terratrembels en il Grischun. Durada 04:05 minutas.
Or da Telesguard dals 14.11.2016.

RR novitads 22.00++