Siglir tar il cuntegn
cuntegn

Svizra Temperaturas da notg da record

Blers lieus en Svizra han registrà la pli chauda notg dapi ch'ins ha cumenzà a far mesiraziuns, quai tenor SRF Meteo.

Ils ultims dis ha il termometer mussà bleras giadas sur 30 grads.
Legenda: Ils ultims dis ha il termometer mussà bleras giadas sur 30 grads. Keystone

A Güttingen en il chantun Turgovia n'è la temperatura betg crudada sut 25,2 grads durant la notg e sin il Züriberg era la pli bassa temperatura sin 24,2 grads. Ina notg uschè chauda hai anc maina dà dapi il cumenzament da mesiraziuns d'avant 135 onns.

La temperatura da la pli chauda notg insumma en Svizra n'è dentant betg vegnida cuntanschida. Il fanadur 2009 aveva il favugn tegnì la temperatura sur 26 grads a Meiringen en la Part Sura Bernaisa.

Stadi d’urgenza en l’Italia

Er l'Italia patescha d'ina gronda chalira e da setgira extrema. La regenza a Roma ha decretà il stadi d'urgenza per las provinzas Parma e Piacenza en il nord da l'Italia. 8,7 milliuns euros èn vegnids deliberads per sustegnair purs ed allevaturs d'animals en il cumbat cunter la setgira. Uschia rapportan medias talianas.

En la Venezia è inquietà il president da la regiun pervi dal nivel bass dals flums. Il flum Po è fin 65% sut il nivel normal. Er la Sardegna ponderescha da decretar il stadi d'urgenza pervi da stgarsezza d'aua.

RR novitads 11.00