Temp da funcziun betg limità

En la debatta per la strategia d'energia 2050 ha il Cussegl dals chantuns refusà da limitar il temp che las ovras atomaras dastgan esser en funcziun.

In'ovra atomara en Svizra.

Legenda da maletgs: Senza mesiras concretas chapita tenor la Fundaziun svizra per l'energia memia pauc. Keystone

Las ovras atomaras dastgan star en funcziun uschè ditg sco quai che las autoritads da surveglianza ENSI lubeschan. L'allianza «Atomausstieg» titulescha la decisiun sco in frain per la midada d'energia. Il Cussegl naziunal era s'exprimì da limitar la funcziun d’ovras atomaras sin 60 onns.

La presidenta da la Confederaziun, Doris Leuthard, ha beneventà la decisiun dal Cussegl dals chantuns da betg limitar il temp che ovras atomars dastgan restar en funcziun. Quai saja ina soluziun realistica, ha ditg Leuthard.

Damain mesiras per spargnar energia

Il Cussegl dals chantuns na vul betg crear stimulaziuns per las ovras electricas che promovan il spargnar energia. En la debatta davart la strategia d'energia 2050 ha il Cussegl dals chantuns decis da stritgar mesiras per dapli effizienza energetica.

La realisaziun saja memia cumplitgada. Plinavant na duain betg ils producents d'energia vegnir motivads da spargnar electricitad, mabain ils consuments, uschia il tenor da la chombra pitschna.

Il Cussegl federal ed il Cussegl naziunal levan formular finamiras per motivar las ovras electricas da spargnar. Ozendi n'è quai betg interessant per ils producents d'energia.

Import d'energia da charvun na duai betg vegnir pli char

En la debatta davart la strategia d'energia 2050 ha il Cussegl dals chantuns refusà d'introducir ina taxa sin energia che na deriva betg cumprovadamain d'ina producziun libra da CO2.

Cunquai ha la chombra pitschna vuschà cunter la cumissiun ch'era s'exprimida per ina uschenumnada taxa d'energia tschuffa. Ils adversaris da questa taxa averteschan surtut d'effects negativs sin l'industria.

RR novitads 11:00 / 14:00 / 18:00 - 24.09.2015, 06:00