Quai è in dals resultats da l'analisa VOX ch'ha examinà la votaziun dals 8 da mars. Sper l’iniziativa d’energia, ha er l’iniziativa da famiglia fatg naufragi.
Omaduas iniziativas èn idas da l’aua giu pervi da la tema da perditas da taglia. Pauca u pitschna influenza sin il cuntegnair da votar aveva l’appartegnientscha ad ina partida, sco che l’analisa VOX mussa.
La PCD aveva pretendì cun sia iniziativa che supplements d’uffants e da scolaziun vegnian liberads da la taglia. 75,4 % dal votants n’han vulì savair nagut da quai.
92 % dals votants avevan ditg na a l'iniziativa d'energia
L’iniziativa d’energia era vegnida refusada anc pli cler cun 92 %. Ils Verd-liberals avevan pretendì che la taglia sin la plivalur vegnia abolida. Enstagl avessi dà ina taglia nova sin la producziun e l’import d’energias betg regenerablas sco ieli, cotgla ed uran.
Per l’analisa VOX ha l’institut Gfs.bern dumandà 1514 persunas cun dretg da votar curt suenter la votaziun.
RR novitads 12:00