La situaziun da corona en Svizra è il mument stabila. Quai scriva la taskforce da la Confederaziun en ses nov rapport. La cifra da reproducziun R saja però pli auta che la valur da 0,8 – ch’il Cussegl federal ha en mira.
Cun las mesiras dals 18 da december vuleva il Cussegl federal procurar che la cifra da reproducziun sa sbassa sut 0,8. Cun questa valur fissi pussaivel da smesar mintga duas emnas il dumber dals cas en Svizra.
Valur dad R è d'interpretar cun precauziun
Tenor il nov rapport da la situaziun è la valur da R actuala cun 0,89 pia cleramain sur la finamira dal Cussegl federal. Sin basa da las ospitalisaziuns è la valur tenor la taskforce tar 0,88 – sin basa dals mortoris tar 0,8. Pervia dal dumber dals tests che varieschan e pervia dals dis da festa saja la valur il mument però d’interpretar cun precauziun.
