Siglir tar il cuntegn
Inhalt

Svizra Tamedia vul surpigliar la Goldbach Group

Il concern da medias svizzer Tamedia vul surpigliar la Goldbach Group. Quai han las duas firmas communitgà il venderdi.

Logo Tamedia.
Legenda: La finamira saja da crescher tar in dals pli gronds commerzialisaders da reclama en Svizra. Keystone

Sco quai che Tamedia communitgescha, ha il pli grond concern da medias svizzer privat fatg in'offerta da 216 milliuns francs. La Goldbach restia però independenta. La cumissiun da concurrenza WEKO sto dentant anc approvar quai.

La finamira da la transacziun saja da crescher tar in dals pli gronds commerzialisaders da reclama en Svizra. E la purschida duai er s'extender en la Germania ed en l'Austria. Sco la Tamedia inditgescha sezza, cuntanschia ella ina gronda part da la populaziun svizra. Quai cun passa 50 medias. Il concern Goldbach Group ha ina posiziun dominanta en la fiera en la commerzialisaziun da medias electronicas.

La Goldbach Group engascha radund 340 persunas en Svizra, en Germania ed en l'Austria. Il CEO da Goldbach resta vinavant Michi Frank. Danov duai el era far part da la direcziun da Tamedia.

RR novitads 07:30

Tamedia

La gronda gruppa da medias svizra edescha tranter auter las gasettas «Tagesanzeiger», «Sonntags Zeitung», «20 Minuten», «Berner Zeitung» e «Schweizer Familie». La fatschenta occupescha radund 3'400 collavuraturs en Svizra, Danemarc, Germania, Frantscha, Israel, Luxemburg, Austria e Serbia. Dapi l'onn 2010 è la Tamedia quotada a la bursa.