Siglir tar il cuntegn

Header

cuntegn

Svizra Tamedia terminescha collavuraziun cun Publicitas

La chasa editura Tamedia terminescha per immediat la collavuraziun cun l’intermediatur da reclama Publicitas e las societads liadas a quel.

La chasa editura Tamedia ha terminà per immediat la collavuaziun cun l'intermediatur da reclama Publicitas, quai perquai ch'els hajan l'ultim onn gì plirs retards cun pajaments. Per la Publicitas saja quest pass stà ina surpraisa. Plinavant n'haja la Publicitas betg tegnì en las empermischiuns, hai num en ina communicaziun da Tamedia.

Tamedia vegnia ad infurmar ils proxims dis tut ils pertutgads che han reservà reclama durant las ultimas emnas sur Publicitas. Plinavant supplitgeschan els da pajar ils quints directamain a Tamedia e betg sur la Publicitas.

Publicitas lavura vid sanaziun

Ina pledadra da Publicitas ha confermà ch’ins haja prendì enconuschientscha da la fin da la collavuraziun cun Tamedia. Quai saja stà ina surpraisa. Davart ils retards tar ils pajament n’ha Publicitas ditg nagut.

Publicitas patescha sco autras chasas edituras da la diminuziun da reclama en gasettas. L'interpresa ha gia pliras giadas scrit cifras cotschnas. Dapi intginas emnas lavurian ins vid in concept da sanaziun per stabilisar la Publicitas a vista media, ha quella communitgà.

Pass giuridics

Suenter quai che la Publicitas ha supplitgà da pajar enavant ad els ils quints ha Tamedia annunzia da vulair examinar pass giuridics cunter Publicitas, quai pervi da violaziun dal contract. La Publicitas haja gia il 2016 surdà tut las pretensiuns envers lur clients a la Tamedia.

Sche clients pajan vinavant quints a la Publicitas ristgian quels da pajar dubel. La supplica da la Publicitas da pajar enavant ad els ils quints fetschian els senza nagin fundament giuridic. Cun quai mainian els sappientivamain en errur lur clients e la Tamedia.

RR novitads 17:00

Artitgels legids il pli savens