- La Tamedia surpiglia la «Basler Zeitung» da la Zeitungshaus SA – che tutga tranter auter a l'anteriur cusseglier federal da la PPS, Christoph Blocher.
- Percunter venda la chasa editura da Turitg lur participaziuns vi dal «Tagblatt der Stadt Zürich» sco er vi dad ulteriuras gasettas gratuitas.
- La cumissiun da concurrenza WEKO sto però anc approvar la fatschenta.
Il schefredactur da la «Basler Zeitung», Markus Somm, vegn suenter l'acquisiziun anc a manar la gasetta da Basilea per in mez onn. Suenter in sabatical vegn el lura pli tard a lavurar sco autur per la Tamedia.
La Zeitungshaus AG (anteriura BaZ-holding) surpiglia percunter la participaziun da la Tamedia da 65% vi da la Tagblatt der Stadt Zürich SA. Il team da redacziun existent da la gasetta gratuita vegn surprendì.
Sper il Tagblatt der Stadt Zürich van er las gasettas gratuitas Furttaler e Rümlanger ed en la Svizra franzosa las participaziuns vi da GHI e Lausanne Cités a la Zeitungshaus SA.
Gia l'avust passà era vegnì enconuschent, che la BaZ-holding surpiglia las gasettas da l'emna da la famiglia editura Zehnder – 25 gasettas gratuitas en 16 regiuns.
Critica da Syndicom
Il sindicat da medias Syndicom crititgescha la surpigliada. Il concern augmentia cunquai sia posiziun da monopol sin il martgà svizzer. Uschia fissan numnadamain 40% da las gasettas dal di en Svizra sut l'ediziun da la Tamedia.
Plinavant crititgescha il sindicat er che Christoph Blocher vul augmentar il dumber da gasettas gratuitas. Quai saja ina mesira per duvrar ellas sco plattafurma per propaganda.
RR novitads 10:00
